الأحد، 18 يوليو، 2010

"الجوهرة المصونة"

ما يحدث الآن فى شوارع مصر يجعلنى فى حالة حزن ..هل أصبح الحجاب مجرد قطعة قماش أضعها على رأسى وكدة أقول إنى محجبة وألبس اللى أنا عايزاه وخلاص؟؟؟؟ 
هو دة الحجاب؟؟؟
ألبس بدى ضيق وقصير وعلى بنطلون وأحط حتة قماشة على راسى ويا سلام بقى لما تكون متخرمة وأقول أنا كدة إتحجبت؟؟؟
واللا فى الشتاء ألبس البوت وجيب قصير وبدى وبرضه أقول إنى محجبة؟؟
وموضة السنة دى.."البندانة الأوصة"..أربط الحجاب وأنزل كام شعراية كدة من الجانبين وأقول أنا محجبة....
ونقول ليه الشباب بقوا كدة؟؟؟ وإيه سبب المعاكسات؟؟؟؟ طيب ماهو لو هو مش محترم وشافك محترمة أكيد مش هيعمل كدة؟؟
أنا مش بقول إنه مش عليه ذنب أو هو اللى صح لأ طبعا هو غلط...بس برضه إنتى اللى عليكى الجزء الأكبر من اللى بيحصل...لو شافك متحجبة صح مش هيعمل كدة...
"مشكلات فى الحجاب الشرعى"
1-أنا عايزة اتزوج
2-أنا عايزة أشتغل وبعض الأشغال مش بتقبلنى بالحجاب
3-أنا عايزة أكون جميلة
أما بالنسبة لأول نقطة فمش دة اللى هيجيب لك العريس لحد عندك لأنه نصيبك كدة كدة مكتوب عند ربنا بس لسة ربنا ما أمرش إنك تشوفيه فمش بحجابك -اللى بتسميه حجاب- هو اللى هيخليكى تتزوجى بسرعة
أما بالنسبة لتانى نقطة ..ترضى إنك تغضبى ربنا لمجرد شغل ما ؟؟ طيب ماهو ربنا هو اللى بإيده يرزقك وهو اللى بإيده يمنعك من الرزق؟؟؟؟
إفتكرى دايما إنه "العمل رزق بيد الله وليس بيد صاحب العمل"
أما بالنسبة لتالت نقطة فوالله مش هو دة الجمال..الجمال جمال الروح..جمال الشخصية..جمال التفكير..مش جمال الوجه 
وحتى لو مش مقتنعة بكدة..وفاكره انه جمال الوجه هو أهم شئ..
فوالله مستحيل إنك ترضى ربنا وربنا ميديكيش نور على وجهك وتبقى أجمل بكتير من قبل كدة...
أدعو جميع القوارير إلى وقفة مع النفس وأن الحجاب ليس بموضه تنتهى ف كل سنة..
إوعى ترخصى نفسك أو تهينى نفسك...خليكى فاكرة.. إنتى غالية وربنا مخليكى غالية..
أخر شئ وأهم شئ...نريد أن يكون حجاب النفس قبل حجاب الرأس وذلك بحب الحياء والعفة والإحتشام...
نريد أن يكون الحجاب هو معنى شامل لحجاب الفتاه المسلمة فهو الغلاف الذى يحمى "الجوهرة المصونة" التى تحمل الكثير من الحياء والأخلاق الكريمة..

2 التعليقات:

sara يقول...

معاكى حق كتير مننا بقى مش فاهم يعنى ايه حجاب
واكتر بقوا بيتعاملو معاه على انه موضه مش بس فى البندانا الاوصة لكن كمان بيلبسوه ويقلعوه وقت ما يحبو
ربنايهدينا جميعا

Dr.Rana يقول...

وهى دى مشكلتنا ياسارة
اللهم امين :)

إرسال تعليق