الاثنين، 26 يوليو، 2010

"حوادث الطرق أو نزيف الأسفلت"..مش هتفرق كتير!!!!

إحترت فى تسميتى للموضوع دة..أخليه حوادث الطرق؟؟؟واللا نزيف الأسفلت؟؟؟ لقيت إنه الإتنين إخوات..مش هتفرق أكتب أنه واحد فيهم..المهم إننا نلاقى أى حل
للمهازل دى......
كل يوم نلاقى فى نشرات الأخبار وفى الصحف وعلى النت وفى أى حتة كلمتين دايما بنقراهم لا ثالث لهما "مصرع....وإصابة"..وحط بقى أى رقم يعجبك..مصرع 10 وإصابة 30..أو مصرع 12 وإصابة 22...أى حاجة بقى..المهم اننا بنقرا الكلمتين دول.. 
بس الشهادة لله..كل يوم بنقرا أماكن مختلفة..شوية الدائرى على الطريق الصحراوى وتعالى بقى على طريق المحور وطريق السلعوة.. ودة بقى.. طريق معرفش إسمه بصراحة فسميته أنا بمعرفتى.. طريق جميييل جداااا وانت رايح على القاهرة الجديدة كدة فى طريق معين هتلاقى بين كل 100 عمود نور بايظ عمود نور واحد بس هو اللى منور..الواحد كدة بيدخله ويسلم أمره لله يا إما يروح ويرجع يا إما يروح وما يرجعش وياسلام بقى على الصواريخ اللى بتمشى هناك على الأرض دى..الواحد لما بيمشى على سرعة 80 واللا 90 كدة بيحس إنه راكب عجلة جنب الصواريخ دى..نسيبنا من الطريق دة شوية ونروح بقى على الاسماعيلية والمنيا وقنا ودمياط يعنى ممكن نقول إنه الحوداث دى مغطية مصر بلا فخر....
طيب موقع الحادث بالظبط بقى فين؟؟؟؟؟؟؟؟؟؟
هات بقى كدة كل الجرايد اللى عندك وراجع معايا.......إما أعلى الكوبرى..إما أسفل الكوبرى -وقعت عليه عربية تانية أو مقطورة مفيش مشاكل- إما موجود على الطريق بس عربية كانت ماشية فى الطريق العكسى وطلعت على الرصيف وراحت سلمت على العربية التانية..أو ممكن يكون فى مغناطيس هو اللى شدهم وفقشهم فى بعض.. أو ممكن يكونوا مقطورتين أو مقطورة مع عربية..أو أوتوبيس مع ميكروباص أو عربية نقل..وإختار بقى اللى يعجبك........أهو كله بنقراه!!!!
طيب ياترى بقى السبب إيه؟؟؟؟؟؟؟
أهم كام حاجة كدة.."جنون السرعة"..."اللى كان بيسوق كان متعاطى أى حاجة مخلياه مش مركز والبتاعة اللى راكبها دى مش مرخصة"..."الراجل عينه غفلت بتاع 10 ثوانى كدة.....وفاق بقى ولقى نفسه خير اللهم إجعله خير بيطير واللا بيتقلب واللا طلع على عربية تانية" 
طيب اللى الحكومة بتعمله بقى إيه؟؟؟؟؟؟
بتمسك السواق دة..تحكم عليه بكام سنة سجن دة إذا كان عايش أصلا....
أما إذا مات فالله يرحمه بقى...وهو احنا هنعمل ايه؟؟؟؟؟ يلا خيرها فى غيرها إن شاء الله.....
طيب وهل يعقل إنه الشخص اللى موت كام بنى آدم كانوا ماشيين فى حالهم يتسجن وخلص الموضوع على كدة؟؟؟ طيب وحق الناس اللى ماتت دى فين؟؟ السجن ليه وخلاص؟؟ يعنى هو يعيش والباقى يموت ؟؟؟
بلاش دى....طالما إحنا عرفنا كل الحوادث اللى بتحصل دى حتى قبل ما نقراهم من كتر الحفظ..ليه مافيش أى حاجة بتتم بخصوص الموضوع دة؟؟ مافيش غير حاجتين هما اللى بيتموا..محاكمة السواق ودفن الموتى..
طيب ليه ما بتتركبش أعمدة نور كتيرة فى الأماكن اللى بتحدث فيها الكوارث دى؟؟؟
ليه مابنعملش حاجة زى كمين كدة أو لجنة كل مسافة معينة نشوف العربيات اللى رايحة واللى جاية والناس اللى فيها حالتهم ايه وخصوصا على الطرق السريعة؟؟؟ 
ليه مبنعملش طرق خاصة بعربيات النقل أو المقطورات اللى بتشيل بالأطنان دى وتمشى فى الطريق دة لوحدها مع إنه مصر دى ماشاء الله مليانة صحراء فاضية  ومفيهاش حاجة؟؟ ونعمل طرق جديدة بدل ما بنكلف حاجة مالهاش أى لازمة كام مليون جنيه؟؟؟؟؟؟
للأسف...حوادث الطرق أصبحت مثل النار فى الهشيم...ولا حياة لمن تنادى!!!

0 التعليقات:

إرسال تعليق