الاثنين، 19 يوليو 2010

"إحسبها صح...تعيشها صح"

من أحد الإعلانات اللى استفزتنى جدا من أول ما شوفتها هو إعلان.."إحسبها صح..تعيشها صح" زى دة مثلا.......


جميل قوى...شيرين وفرت تمن الأدوية الكتيييييير بتوعها وراحت جابت كتاب لكريم ولنفسها كمان...

بس بيتهيألى هما بالغوا شوية فى الإعلان دة..كان المفروض إنها تدفع الأقساط بتاعة الفيلا اللى فى مارينا..ومصاريف المدرسة اللغات بتاعة كريم..وتحط الباقى فى البنك وتاخد من الأرباح بالمرة...
هما مش عارفين إنه فى ناس مش لاقية تمن الدواء حتى ولو إنتهت صلاحيته؟؟!!!
أومال إيه حكاية العلاج على نفقة الدولة دى؟؟؟؟؟
وإيه حكاية الناس اللى بيبقوا محتاجين أدوية تمنها يتجاوز 30 و40 ألف ومرتبهم مايزيدش عن 500 جنيه؟؟؟؟؟؟؟
دول مش من مصر مثلا؟؟؟؟؟؟؟واللا دول ناس بتضحك علينا مثلا عشان ياخدوا الفلوس ويهربوا؟؟؟؟؟؟؟؟؟؟ بتضحكوا علينا واللا على نفسكوا؟؟؟؟واللا يمكن إحنا اللى غلطانين و"ماحسبناهاش صح"؟؟؟؟؟!!!!

الإعلان التانى الذى لا يقل حظا عن اللى فات



عادل..شخص مدبر جدا..وقدر يحوش فى وقت قصير جدا..تمن الشبكة والشقة وقدر يتجوز.. علشان ماقضاهاش "ديليفرى... وعمل عجة تجنن"
والله لو كان السبب فى العجة دى كان كل شباب مصر أكل العجة دى طول عمرهم لحد ما يحققوا كل اللى هما عايزينه ومش بعيد يتصوروا جنبها!!!!!!
اللا هو الديليفرى اللى مخلى الشباب كدة؟؟؟ مش عارفين يجيبوا شقق ولا يتجوزوا ولا يعيشوا حياة كويسة ولا يتعلموا صح ويبقوا ناس كويسة؟؟؟؟؟كل دة بسبب الديليفرى؟؟؟
أكيد برضه علشان "ماحسبوهاش صح"!!!!! 
وأكيد فى أسباب تانية غير "العجة بتاعة عادل" و"الأدوية بتاعة شيرين" زى مثلا..
1-أم سيد قعدت إبنها من المدرسة علشان تجيب أكل للعيال.."إحسبها صح..تعيشها صح"
2-نبراوى بيه..بدل ما يشترى عربية BMW قرر إنه يشترى عربية هيونداى علشان يدفع أقساط الفيلا اللى فى مارينا.."إحسبها صح ..تعيشها صح"
3-ذكى أفندى وفر من الساعة اللى بيصلي فيها الظهر فى شغله فى الشركه وزوغ ساعة بدرى.."إحسبها صح..تعيشها صح"
أنا مش فاهمة دة إسمه ايه؟؟؟؟؟؟ إستخفاف بالعقول؟؟؟واللا بيصغروا نفسهم أكتر ماهم صغيرين قدامنا؟؟؟؟؟

الشئ الأكثر خطورة.."اللمبات الموفرة للطاقة"
الكلام اللى جاى دة كلام منتديات عديدة وقرأت مثلها فى جريدة الأهرام..

"أكدت العديد من المنظمات المعنية بالصحة العامة وأخيرا اعلنت وزارة الصحة البريطانية ان هذا النوع من اللمبات الموفر للطاقة خطير جدا لدرجة انه يجب على الجميع مغادرة الغرفة لمدة 15 دقيقة في حال سقوط اللمبة وتكسرها توجد بداخل اللمبة زئبق سام يؤدي في حال استنشاقه إلى صداع نصفي أو نوع من الغير الاتزان الترنح ..وكثير من الذين لديهم حساسية مفرطة تأتيهم أمراض جلدية من مجرد التعرض لها
كما حذرت الوزارة من عدم تنظيف اللمبة المحطمة بالمكنسة الكهربائية وذلك بسبب احتمال تناثر غبار تلك المكنسة في حال تنظيف غرف البيت الأخرى بل يجب التنظيف بواسطة فرشة عادية ومجرفة. توضع في لفافة مغلقة جيدا وتضع في مخلفات المنزل المعدة للخروج من المنزل فورا. وعدم التساهل في إبقائها في المنزل. وإسمها "
Compact Fluorescent Bulb" 
يعنى لو حسبناها صح..-زى ما بيقولوا- هنلاقى إننا خسرانين فى كل الأحوال ومش بس كدة..دول هيجيبولنا المرض كمان ..وحسبنا الله ونعم الوكيل
 

4 التعليقات:

No2a يقول...

والله عندك حق يا رونى .... هم فعلا بستخفوا بعقولنا
وبيحاولوا على قد ما يقدروا يلهونا عنهم ويملوا دماغنا بكلام تانى عشان ما نفوقش من اللى احنا فيه .. وعلى فكرة ده اللى حاااصل ... قليل اوى لما تلاقى حد مننا منتبه للى بيحصل او حتى عنده نيه انه ينتبه .. بس بجد تسلم اديكى والله يابنتى :)

Dr.Rana يقول...

وانتى كمان عندك حق يانؤنؤ..بس هنعمل ايه بقى؟؟؟
لنا الله فى كل اللى احنا فيه دة...
نورتى المدونة يانؤنؤ :)

Unknown يقول...

دول بيشتغلووووووووووووووونا
وبيحاولو يلهونا بحاجات تانيه كتير يا نؤنؤ زى ماتشات الكورة وحاجات تانية كتييييييييييييير
وياريت كل شاب فى مصر يوفر شويه علشان يسدد اقساط الشقه والعربية والباقى يتبرع بيه لتسديد ديون مصر

Dr.Rana يقول...

مظبوط كلامك ياسارة
يستحضرنى المثل القائل:"هم يضحك وهم يبكى"
نورتى ياسارة:)

إرسال تعليق