الاثنين، 9 أغسطس، 2010

"جدول صائم"

زى ما بنعمل جدول للمذاكرة وجدول للعمل وجداول أخرى..ممكن نعمل جدول نمشى عليه فى رمضان بشرط إننا نكون هنقدر ننفذه مش نكتب حاجات من الصعب إننا ننفذها لآخر الشهر فأكيد حماسنا هيقل وممكن منكملش.. 
طيب الجدول دة هيكون ماشى إزاى؟؟؟
هنكتب الحاجات الأساسية المفروض نعملها فى رمضان زى مثلا صلاة التراويح و ختم القرآن الكريم وغيرهم بس هنحاول إننا نعمل حاجة جديدة فى رمضان دة عن رمضان اللى فات..يعنى مثلا اللى ختم القران مرة واحدة فى رمضان اللى فات يختمه السنة دى مرتين..واللى ختمه مرتين يختمه تلاتة..واللى ماختموش خالص يختمه..

أنا هقول حاجات من السهل جدا إننا نعملها ونمشى عليها لآخر الشهر ممكن أى حد ينفذها ويزود من عنده..

1- ختم القرآن الكريم 3 مرات:
اللى يقرأ كدة 3 مرات دى يحس إنها صعب قوى إننا هنقدر عليها مع إنها والله بسيطة جدا
يعنى مثلا..قراءة جزء من القرآن بتدبر بتاخد نص ساعة يعنى احنا محتاجين ساعة ونص بس من ال24 ساعة..طيب الساعة ونص دول هنقسمهم إزاى؟؟
أول ما نقوم من النوم وقبل ما نشوف شغلنا نقرأ جزء وبعد الفجر مثلا أو قبل السحور كمان جزء..كدة يتبقى جزء واحد فى اليوم كله سهل جدا إننا نقراه فى أى وقت ..أو ممكن مثلا نقراه وإحنا بنصلى التراويح...طيب النتيجة إيه؟؟؟؟
حسنات ختمة القرآن الكريم فى الأيام العادية = 3.3 مليون حسنة .."أى تمحو 3.3 مليون سيئة" ومضاعفة الحسنات فى رمضان جعلت ثواب العمرة فى رمضان = ثواب الحج مع رسول الله..طيب وختمة القرآن الكريم فى رمضان ناخد كام حسنة؟؟؟؟؟ طيب ولو ختمتين؟؟؟؟ ولو تلاتة؟؟؟؟؟ شوف بقى كام مليون حسنة....

2- صلاة التراويح: 
بيتهيألى دى مافيهاش كلام..كلنا بنصلى التراويح إما فى المسجد أو فى البيت..بس المهم إننا نصليها لحد آخر الشهر..النتيجة إيه؟؟؟
"يقول رسول الله صلى الله عليه وسلم:من قام رمضان إيمانا واحتسابا غُفر له ما تفدم من ذنبه"  
 إيمانا بمعنى الإعتقاد بأن قيام رمضان سنة مؤكدة..واحتسابا بمعنى طلب الأجر ورجاء الثواب من الله تعالى.

3- صلوات السُنن الرواتب:
اللى هما قبل الفجر ركعتين، وقبل الظهر أربع ركعات، وبعد الظهر ركعتين، وبعد المغرب ركعتين، وبعد العشاء ركعتين..النتيجة إيه؟؟؟
يقول رسول الله صلى الله عليه وسلم: "ما من عبد مسلم يصلي لله تعالى كل يوم ثنتي عشرة ركعة تطوعا غير فريضة إلا بنى الله له بيتا في الجنة"

4- الدعاء:
لو دعيت فى رمضان كل يوم وليلة هيكون ليك 60 دعوة مستجابة بمعنى أصح هتتحل 60 مشكلة فى حياتك أو يتحققلك 60 حلم من أحلامك..طيب إزاى؟؟؟؟
يقول رسول الله صلى الله عليه وسلم:"ولكل مسلم فى كل يوم وليلة دعوة مستجابة" وطبعا من أجمل الدعوات اللى المفروض ندعى بيها إن ربنا يعتقنا من النار 
"إن لله تبارك وتعالى عتقاء فى كل يوم وليلة"....أكثر من الدعاء

5- الصلاة فى جماعة:
سهل جدا إنك تصلى جماعة ..مش شرط فى المسجد..ممكن مع أخوك أو أختك أو أى حد من أسرتك وخاصة صلاة الصبح وصلاة العشاء.
عن عثمان رضي الله عنه قال: سمعت رسول الله صلى الله عليه وسلم يقول:"من صلى العشاء في جماعة فكأنما قام نصف الليل، ومن صلى الصبح في جماعة فكأنما قام الليل كله".
حديث آخر:قال رسول الله صلى الله عليه وسلم:"من صلى الصبح في جماعة فهو في ذمة الله تعالى". 

6- الصدقة:
أكتفى بقول الله تعالى:"مَثَلُ الَّذِينَ يُنْفِقُونَ أَمْوَالَهُمْ فِي سَبِيلِ اللَّهِ كَمَثَلِ حَبَّةٍ أَنْبَتَتْ سَبْعَ سَنَابِلَ فِي كُلِّ سُنْبُلَةٍ مِئَةُ حَبَّةٍ وَاللَّهُ يُضَاعِفُ لِمَنْ يَشَاءُ وَاللَّهُ وَاسِعٌ عَلِيمٌ ،الَّذِينَ يُنْفِقُونَ أَمْوَالَهُمْ فِي سَبِيلِ اللَّهِ ثُمَّ لَا يُتْبِعُونَ مَا أَنْفَقُوا مَنًّا وَلا أَذًى لَهُمْ أَجْرُهُمْ عِنْدَ رَبِّهِمْ وَلا خَوْفٌ عَلَيْهِمْ وَلا هُمْ يَحْزَنُونَ" البقرة / 261 ، 262 . 

7- صلة الرحم:
هل قمت بما يجب لهم عليك من صلة؟؟؟هل شرحت صدرك عند لقائهم؟؟؟هل قمت بما يجب لهم من محبة وتكريم واحترام؟؟؟هل أطلقت الوجوه لهم؟؟
فرصتك فى رمضان إنك تقدر تصلح كل علاقاتك مع قرايبك..
 حديث:"من أراد أن يُنسأ له فى أثره فليصل رحمه"..بمعنى من أحب أن يبسط له في رزقه فيكثر ويوسع عليه ويبارك له فيه ، أو أحب أن يؤخر له في عمره فيطول : فليصل رحمه..

أظن إنه الحاجات دى تتعمل بمنتهى السهولة واليسر مفيهاش أى تعب أو إستبعاد إنها متتعملش وياريت اللى فى مقدرته يزود كمان من عنده ...أذكركم وأذكر نفسى بقول رسول الله صلى الله عليه وسلم عن رمضان:
"من تقرب فيه بخصلة من خصال الخير , كان كمن أدى فريضة فيما سواه , ومن أدى فيه فريضة , كان كمن أدى سبعين فريضة فيما سواه"
رمضان فرصتنا الحقيقية للتغيير ياريت مانضيعهاش..إحنا مش ضامنين حياتنا علشان نستنى رمضان اللى بعده...دايما نخلى شعارنا: "وعجلت إليك ربى لترضى"

0 التعليقات:

إرسال تعليق